Plantun de Prouvènço

Pèr coumpara dos planto d'encò nostre

Egeria densa & Scrophularia nodosa

Egeria densa

Hydrocharitaceae

Nom en français : Élodée dense.

Descripcioun :
L'éloudèio-espesso, que nous vèn de l'Americo dóu miejour, trachis en coulounìo dins l'aigo tranquilo. Se recounèis à si fueio groupado pèr mai que tres (subretout en aut di cambo), longo de 10 à 13 mm e proun torso vers lou bas. Au nostre, i'a soulamen de flour masclo, de gròssi flour, à la fin de l'estiéu, que dounon d'èr à li de l'Hydrocaris. Coumpara emé l'eloudèio-dóu-Canada que ié sèmblo proun, mai si fueio soun toujour groupado pèr tres.

Usanço :
Es uno planto envahissènto mens coumuno que sa cousino dóu Canada, pamens es en trin de s'espandis proun rapidamen. Couneissèn pas d'usanço particuliero pèr aquelo planto. Escriéure au site se n'en sabès mai.

Port : Grando erbo
Taio : 40 à 150 cm
Fueio : costo paralèlo
Tipe bioulougico : Idroufite
Cicle bioulougico : Planto renadivo

Gènre : Egeria
Famiho : Hydrocharitaceae

Ordre : Alismatales

Coulour de la flour : Verdo
Petalo : 3
Ø (o loungour) enflourejado : 0,5 à 1,5 cm
Flourido : Estiéu

Sòu : Ca
Autour basso e auto : 0 à 600 m
Aparado : Noun
Remarco : Planto envahissènto
Avoust à setèmbre

Liò : Aigo - Lono - Roubino - Ribiero
Estànci : Termoumediterran à Coulinen
Couroulougi : Óurigino Americo-Sud
Ref. sc. : Egeria densa Planch., 1849 (= Elodea densa (Planch.) Casp. )

Erbo-dis-escrolo

Scrophularia nodosa

Scrophulariaceae

Nom en français : Scrofulaire noueuse.

Descripcioun :
L'erbo-dis-escrolo douno d'èr à l'erbo-dóu-siège, pamens èi mens forto, sa tijo èi carrado mai sènso alo e pleno (fotò). Ei gaire coumuno au nostre, aleva dins lis Aup marino. Trachis dins li relarg fres.

Usanço :
Coume soun noum lou dis, l'erbo-dis-escrolo èro emplegado pèr gari (o pulèu sougna) lis escrolo que soun de boufigo (fotò) que vènon dins lou còu en rapport emé la tuberculòsi que ié disien à l'Age-Mejan, en latin, struma o morbus regius (mau de rèi). A l'Age-Mejan li rèi an lou poudé de gari lis escrofo ("écrouelles" en francés). A forto doso la planto pourrié èstre empouisounanto.